संपादक =गुरुदेव इसमोरे
पाथर्डी महाविद्यालयासमोरील भरधाव वाहतुकीला लगाम घालणार कोण? विद्यार्थ्यांच्या सुरक्षेबाबत सार्वजनिक बांधकाम विभागाची उदासीनता?
अकोट–तेल्हारा मार्गावरील श्री संत गजानन महाराज कनिष्ठ महाविद्यालय, पाथर्डी येथे विद्यार्थ्यांच्या सुरक्षिततेचा प्रश्न ऐरणीवर आला आहे. महाविद्यालयासमोरून दररोज मोठ्या प्रमाणात वाहनांची वर्दळ सुरू असते. अनेक वाहने भरधाव वेगाने ये-जा करत असल्यामुळे रस्ता ओलांडताना विद्यार्थ्यांना अपघाताचा धोका निर्माण होण्याची शक्यता आहे.
महाविद्यालयात शिक्षण घेण्यासाठी परिसरातील अनेक विद्यार्थी दररोज ये-जा करतात. महाविद्यालयाच्या परिसरात विद्यार्थ्यांची मोठी वर्दळ असतानाही वाहनांच्या वेगावर नियंत्रण ठेवण्यासाठी आवश्यक गतिरोधक नसल्याने विद्यार्थ्यांच्या सुरक्षिततेचा प्रश्न निर्माण झाला आहे.
या गंभीर बाबीची दखल घेत श्री संत गजानन महाराज कनिष्ठ महाविद्यालयाच्या वतीने दिनांक ३१ ऑगस्ट २०२६ रोजी सार्वजनिक बांधकाम विभाग, तेल्हारा येथील उपविभागीय अभियंता यांच्याकडे महाविद्यालयासमोर गतिरोधक बसविण्याबाबत लेखी निवेदन देण्यात आले होते. मात्र, निवेदन देऊन दोन महिने उलटून गेले तरी अद्यापपर्यंत महाविद्यालयासमोर गतिरोधक बसविण्यात आलेले नाहीत. त्यामुळे संबंधित विभागाच्या कार्यवाहीबाबत प्रश्नचिन्ह उपस्थित होत आहे.
विशेष म्हणजे, विद्यार्थ्यांच्या सुरक्षेच्या दृष्टीने महाविद्यालयासमोर साधे गतिरोधक बसविण्याची मागणी करण्यात आली असतानाही दोन महिने उलटून गेले तरी संबंधित विभागाला अद्याप ही छोटीशी कामगिरी पूर्ण करता आलेली नाही. विद्यार्थ्यांच्या सुरक्षिततेसाठी साधे गतिरोधक बसविण्यासही इतका विलंब होत असेल, तर सार्वजनिक बांधकाम विभागाच्या कार्यक्षमतेबाबत प्रश्न उपस्थित होणे स्वाभाविक आहे.
विद्यार्थ्यांचे जीवित सुरक्षित राहावे, संभाव्य अपघात टाळता यावेत आणि वाहनचालकांनी महाविद्यालय परिसरात वाहनांचा वेग मर्यादित ठेवावा, यासाठी गतिरोधक बसविणे अत्यंत आवश्यक आहे. मात्र, लेखी निवेदन देऊनही अद्याप कोणतीही ठोस कार्यवाही झालेली नसल्याने महाविद्यालय प्रशासनासह पालक आणि परिसरातील नागरिकांमध्ये नाराजी व्यक्त होत आहे.
एखादी दुर्घटना घडल्यानंतरच प्रशासनाला जाग येणार का? विद्यार्थ्यांच्या सुरक्षिततेसारख्या महत्त्वाच्या विषयाकडे संबंधित विभागाने गांभीर्याने लक्ष देण्याची गरज आहे. संभाव्य अपघात टाळण्यासाठी कोणत्याही अनुचित घटनेची वाट न पाहता सार्वजनिक बांधकाम विभागाने तातडीने पाहणी करून नियमानुसार महाविद्यालयासमोर गतिरोधक बसवावेत, अशी मागणी होत आहे.
आता तरी सार्वजनिक बांधकाम विभाग या निवेदनाची दखल घेऊन विद्यार्थ्यांच्या सुरक्षेसाठी ठोस पावले उचलणार का? की साधे गतिरोधक बसविण्यासाठीही विद्यार्थ्यांना आणखी किती दिवस प्रतीक्षा करावी लागणार, असा सवाल विद्यार्थी, पालक आणि परिसरातील नागरिकांकडून उपस्थित केला जात आहे.
